फिएनि फिसाज्ला, by Ronjoy Brahma Subscribe to rss feed for Ronjoy Brahma

दिखुरा दिँदिँनि
बिफाया खखा एम एल एनि
थाम्फै होग्रा,
गुंग्राय फुगारनानै
होग्रा,

जुथा खुनानै होग्रा,
बार सिबनानै होग्रा आरो
खर' बिलिरनानै होग्रा
बायदिसिना होननानै
रायजोफोरा सोरबा सोरबा
नावद्रा बुयो।

बेल' नङा दिखुरा
दिँदिँआ सासे
फोसावलिया, जिगाब
बुन्था, फ्लाष्टिकसो
बिनि गोसोआ होननानै
जेसिबिजोँ खोआखो
जावसोबायो सोरबा
सोरबा।

नंगौना नङा आंथ'
मिथियानो।

थेवबो मिथिगौ आं दिखुरा
दिँदिँआ बालाबारि
गामिनि सेल्प हेल्पनि
लिदारि खायलेँनि
फिसाजो बालेँ
मोसाहारिखौ हाबा
खालामबाय।

हाबा जानाया नै बोसोर
जाबाय।

मानसिया फि इउ फास
जानाय, बिनि महरखौ
रुजुनोब्ला सोर्गोनि
मेन'काखौ गोसोखांनो
नांगोन।

गोसो थोनानै जेबो नाङा,
नोँखौल' नांगौ
होनलायनानै हाबा
लानानैबो दिनै दिखुरा
दिँदिँनि नोजोराव बा
फैसानि बेसेन गैया
बालेँआ।

बेखायनो जौ फेबाथाय
बियो बालेंनि मोदोमाव
थोआ थोआ खावलाय
फारनैयाव दल दामना
मोसाबाय थायो।

बेल' नंबावासो दिँदिँआ
बिखुनजोनि न'आव अरखि
खुबैहरबाय थायो।

हाबानि समावबो अमा
फानबाय, मोसौ फानबाय
आरो जि रोजामानि
मालायनि रिन
लाबोलायनाबो 15 रोजानि
सना हरनांदोँ।

फिसाजोआबो बालेँलेँ
देलाइमांग्रिखौनो
बुंनांगोन।

दिँदिँआ बिए फास जादोँ
जेबो खामानियाव
होआखिसै थेवबो।

बिखुनजोनि न'नि
सोरगिदिँ थानाय
गाम्बारि, सिगुन बायदि
दंफांखौनो आसि थुहरबाय
थायो बियो।

ओजोँ बालेंनि साबा
फंबायफोराबो खम नङा।

नांगौ जायोब्ला बिसोर
कुरुक्षेत्रनि
मिसाइलखौनो बाहायगोन।

दिनैबो नाथाय दल दामना
जारा फाग्ला मोसायो
दिखुरा दिँदिँआ। 
Posted: 2014-12-21 09:11:16 UTC

This poem has no votes yet. To vote, you must be logged in.
To leave comments, you must be logged in.
Tweet