रजे! नोँ थांनानै था 0.9, by Ronjoy Brahma Subscribe to rss feed for Ronjoy Brahma

गामिनि गासैबो
सेंग्राफोरा सोरगिदिँ
फ्लाष्टिक बनानै
जिरायदोँ।

दान्दिसे गासैबो सिरि
सिरि थासावदोँ बे
समावनो गामिनिनो
लाइमोन आफादनि
नेहाथारि बिरखांआ
गसंनानै बुंबाय-

"दिनैनि दान्दिसे
लाब्रबनाय बे मेलखौ
सामलायनो थाखाय
आफादगिरि गोनांथि
बादियै जोँनिनो थाखाय
आफादनि आफादगिरि आदा
फेँखाखौ सायखनाय
जाबाय।"

एसेयावनो फेँखायाबो
गसंनानै बुंबाय-

"जोँनि गामिया
साबस्रांनाय आरो गोगो
सोलोँथाइसिम फैनो
हानायनि थाखाय जोँनो
गोदान जिउ नांगौ।

बेखायनो जोँ दिनै जा
रोँगौ जोँनि
उन्दैफोरनो आरो जोँनि
जाम्बा जाम्बि आय आफानि
आदुवा सानस्रिखौ एसे
सोलायहोनो हायो खोमा
होननानै, जोँ दिनै
लाइमोनफोरा बिगियाननि
लामाखौ संदानदोँ।

दिनैसिम जोँनि गामियाव
लाइमोन आफाद दाजानायनि
उनाव गोबां सोलायबाय।

गोजामनिफ्राय गोजाम
जाबोनाय गामिनि संसार
जानायाव आख' फाख' माखासे
फोथायफोरा
जायखारलांबाय।

सिगांनिबादिनो आरोबाव
साबसिनै जोँ दिनै
बैसागु फांसन खुंनो
थाखाय देग्लायबो
सानदोँ बेखायनो
माबादिसिम जोँ देग्लाय
खुंनो हायो बेखौ
सानलायदिनि।"

"सिगांआव जेरैबादि
खुंनाय जादोँमोन
बेबादिनो खुंनो हायो,
एसे समायनासिन
खालामनानै।

मानोना जेसे रां खरसा
खालामो समायनासिन
जायो।

नाथाय समायनाब्लाबो
सिं आरो सानि गुणखौ जोँ
नायग्रोनांगोन।

बेखायनो आं सान्दोँ
थांनाय बोसोरनि बादिनो
खालामनि आरो गासै मोजां
मोजां गोसो गुदुं
बाहागो लाग्राफोरनो
बिसोरनि दिन्थिनाय
गुणखौ नायनानै जाहाथे
जा हायो बान्था हिसाबै
हरनो हायो।" बिथराइआ
बुंबाय।

"औ थांनाय बोसोरनि
बादियानो मोजां जागोन।

एबाराव बांसिन बाहागो
लानो फैनो हागौ।

जाहाथे आरोबाव बिसोर
गोसो गुदुं जाना इयुनाव
दावगा लांनो हायो बिनि
थाखाय एसे एसे...।"

एसेयाव गोसोआव बुंगौ
बुंगौ नंबाय थानाय
रनजयआ बुङो-

"औ--- जेसेबां हायो
मोजाङै खुंनो हायोब्ला
मोजां, नाथाय जोबथा
समायनाजोँनो मोजांथार
खालामनो हाया।

फिसा समायनानि सायावसो
बांसिन गोजोन दं,
बेयावनो मैला मोनसेबो
गैयै जाफुंसारनायबो
जानो हायो।

आरो जुदि मोजाङै जाफुं
होनो लुबैयो, अब्ला जोँ
गासैबो जाफुंगोन बादि
खामानिखौनो
मावनांगोन।"

"जोँनि खाथि खाला
गामियाव गोबांआनो
बैसागुखौ
नांलाय-खमलायैनो
दासिमबो हगार हरो।

लोँनाय-जानायल'जोँनो
लामा सामा गोग्लैनानै
थानाय।

थाफ्लि फैला फैला हरफा
सानफा दिनैनि
मुगायावबो बै समनि
बादिनो हगारहरदोँ।

नाथाय जोँ दिनै बे समाव
बैसागुखौ बिगियाननि
नोजोरजोँ नायनांसिगोन,
बिजिर नांगोन।

जाहाथे बैसागुआबो
बिगियाननि मुगायाव
गोमालाङा अदेबानि
समायनानिफ्राय समायना
अरायसम दुलाराइ
मुलुगनि गेजेरावनो
बावजाया लासेनो थाबाय
थायो।

बेखायनो जोँ दिनै
फिसायैब्लाबो साबसिन
गोसोयै गोदान गोगोसिन
मोन्दांथिजोँ गामिनि
खाथि खालायाव थानाय
लाइमोन फरायसा सेँग्रा
सिख्लाफोरखौ लानानै बे
फ्रग्रामखौ खुंनि।

जाहाथे दिनैनि फरायसा
गथ'फोरनि गोरबोआव
आरोबाव साबसिन गोगोसिन
मोन्दांथि सोमजियो,
गोगो सानस्रिया
बेरखांङो।" अरना गावनि
सान्नायखौ फोरमायबाय।

"जोँ मिथिगौ, रावबो
मिथियै नङा।

जिउ नाङैनो बेसेबा
गोलाव समाव जोँनि बिमा
बिफाफ्रा जायगा
दाबसेयाव दुखुजोँ दुखु,
सुखुजोँ सुखु संसार
जाबोबाय।

बिसोर दिनैबो जेबो
गोदानथिखौनो सोलोँनो
हायाखिसै।

बेखायनो बिसोरनि
जाम्बाथिखौ होखारनानै
जोँनो दिनै  बिसोरखौ
फोरोँनि।

बेसेबा समनिफ्राय
जोँनि समाजाव जेथो जाना
थानाय खान्थिफोरखौ
होखार हरनि।

बेखायनो बेनो राहाया,
बे फ्रग्रामावनो जोँ
हायोब्ला मोसानाय आरो
मेथाइ रोजाबनायनि
अनगायैबो थुनलाइखौ
लाफानि।

मानोना मोनफ्रोमबो
आयदानि मोनसेखौ
गारनांगौ जायोब्लानो
जोँहा मोनसे खाना
जानायबादि जायो।

सोरबा बबेबा आयदाखौ
रोङाब्लाबो जाहाथे
मोनसे आयदायाव बाहागो
लानो हायो।

बिसोरनि जाखांबोनाय
रोँगौथिखौ जोँ जाहाथे
बुजिना एसे एसे मदद
होनानैब्लाबो जेरै
गोजौसिम दिखांहरनो
हायो।

सासे जाम्बानि एबा
जाम्बिनि फिसाया
सोरनिबा मददजोँ गोरोँ
जायोब्ला बे माब्लाबो
बिमाफा बेबादिनो
आदुवाथियाव थानो होनाय
नङा।

बेखायनो बिफाखौ हाया
फिसाखौ गोरोँ खालामनि
जोँ, फिसाया जुदि गोरोँ
जायो बिनि बिमा एबा
बिफाया गोबां सोलायनाय
फैगोन फैथारगोन बेयो
सैथो।"

बेबादिनो जाय जा
मोन्दांथिदोँ गाव
गावनि सान्नायखौ बयबो
फोरमायथिबाय।

उन थाराव थि खालामना
लानाय जाबायदि-

साफ्रोम लाइमोनानो
बाहागो लानो नांगौ,
आफादखौ सालायनायाव
गोसो गुदुं खामानि
मावनांगौ।

फांसन जानायनि समा
फैयोब्लानो सानसे
थुनलाइ आरो हारिमुनि
बायदि मोसानाय, मेथाइ
खन्नाय, फावथिनाय बायदि
बादिलायनाय लानाय
जागोन।

सालगुरि गामिनि सेर सेर
थानाय मोनफ्रोम गामिनि
लाइमोनफोरखौनो घोरोम
सायख'वालासे बाहागो
लानो थाखाय गांफा
गामियाव लाइजाम लिरना
हांख्राय हरगोन।

सानसे बादि लायनाय
हाबाफारि थांनाय अखा
नायै देँखो मोनाबिलिखौ
लानाय जागोन।

आरो थांनाय सानाव
जालांनाय बादि
लायनायनि बान्थाखौ
होनाय जागोन।
Posted: 2016-02-07 10:47:23 UTC

This poem has no votes yet. To vote, you must be logged in.
To leave comments, you must be logged in.
Tweet