बंग्लानि हेँथायै, by Ronjoy Brahma Subscribe to rss feed for Ronjoy Brahma

बंग्लानि हेँथायै
खुसेंग्ला आरो
लामाखान्दाय।

थास' बिलाइ बिलाइ
थाखोमानाबो आगोर
मोनाखै।

आदिदिगा, दुब्रि बिलाइ
बायदिजोँ माथुनाबो
आगोरमोनाखै
खुसेंग्राया।

सान-हरथाम गोगोम अखा
हानायजोँ गगा मोनगु
खबसिनानै थानांदोँ।

न'लुनो रोङै
लामाखान्दाया बहा
थागोन बहा मा खालामगोन?

खेबसे बामब्रमानि
बासायाव
हाबब्रहैनायाव
दामजाहरदोँ।

खेबसे खैजेमानि न'आव
सहैनायाव गाराय
जागुलायनाय अरजादोँ।

दिनै बिनिनो रागा
खुसेंग्रा आरो
लामाखान्दायमोनियाव।

बिनि खिथेरखौ सोरनियाव
होखारनो?

बेबादिनो लामा खान्दाय
आरो खुसेंग्राजोँ
सावरायलायनानै मोनसे
गरन्थआव फैदोँ।

"बंग्ला मुरदाबाद।
बंग्लाबो बुथारनांगौ।
बानाखौ रैखा
खालामनांगौ।"

आलि खनानिफ्राय
ओँखारना नायहरदोँ
बंग्लाया।

दिउ दिउ रागा
जोँखांदोँबो। आलि
गोजौआव गाखोना
नायहरनायखौ
खुसेंग्राया
नुहरदोँमोन।

गोर गोर खारलांनानै
बंग्लाखौ फ्लाइ किक
होनायसै।
बंग्लाया जल्दब
गोग्लैदोँमोन हरखाब।

ब्रुस्लि, जेकि आरो
जेडलिमोन
बुलायग्राबादिनो
इन्टार-डा-ड्रागन
दावहाया जानायसै।

बंग्लाया बुंनो
सानदोँमोन-

"बैसागुआ फैनाय लोगो
लोगो बयबो रंजाबाय।

रंजानाय बोथोराव आंलाय
रंजानो मोना नामा?

आंनि रंजानायाव अखा
हायोब्ला आंखौ
नोँथांमोना सिबिनो
सानाब्लाबो लोगो साननो
हाया नामा?"

नाथाय सिबाय! जोजायै
सौजायैनो खारै खारै
दैयावनो बाज्रुमनो
गोनां जाबाय बंग्लाया।

बे दैयावनो थैबाय साला
बेत्ताया होननानै
खुसेंग्रा आरो
लामाखान्दाया ग्लाब
ग्लाब मिनिदोँ। 
Posted: 2016-04-23 10:57:23 UTC

This poem has no votes yet. To vote, you must be logged in.
To leave comments, you must be logged in.
Tweet