मावजि गोसोमनि बेगेँ, by Ronjoy Brahma Subscribe to rss feed for Ronjoy Brahma

दाखालि अमाबैस्या हरनि
12 रिँगायाव गोथाङै
गोथां जोँनि गामिनि
सारियालि लामायाव
मावजि गोसोमखौ फबदों
आं।

दिनै अमाबैस्या
फैलायबाय।
दिनै हरनि 12 रिँगायाव बे
मावजि गोसोमनि बेगेँखौ
लंथंङै थांनानै लंथंङै
लाबोनांगौ।

थैनानै थांनाय आबौ
बोन्दोँ अजाया
बुंलांदोँमोन-

"जेब्ला नोँ मावजि
गोसोमनि बेगेँखौ लायनो
थाङो,
अब्ला नोँखौ बुहुतआ
जोबोद सिगिगोन।

लामायाव हाराव हाथाव
हाथाइ दिन्थिनानै खौगा
ब्लां ब्लां सिनानै
थागोन।

आरो जेराव नोँ मावजि
गोसोमखौ फबदों बे हाखर
सेराव मोसा लख्रा, जिबौ
फिथिगममोना नोँखौ
सौहां सौहां खालामगोन।

फारब्रै लामाजोँनो
नोँखौ बुहुतआ जमनानै
थागोन।

नोँ मावजि गोसोमनि
बेगेँखौ बुरखांनाय
समाव मेसेबनो नाङा।
आवबा जायो।

जै मावजि गोसोमनि
बेगेँखौ मोनबाय, नोङो
गिनांगौ गैलिया।
बिनि उनाव नोङो गोमोरनो
हासिगोन।"

दिनै बेबादिनो हरनि 12
रिँगा समखौ नेयै नेयैनो
थेनथौगु लायदोँ आं।

बेबादि हरनि 12
रिँगायाबो फैबाय।
लोगो लोगो गामसाखौ
खुबाय आं।
गोदोनानि रजे मालाखौबो
दोनबाय।

दा आं फुरा लंथंसै।
लंथं जानाय लोगो लोगो
जोबोद गिबाय आं।
गिनायजोँनो
गोलोमस्राव लायबायबो।

थेवबो गोमोरनो गोरोँ
जानो थाखाय आं जोबोद
गोसो।
गिनायानो देरसिन जानो
हाया।

थांबाय आं सारियालि
फारसे, जेराव मावजि
गोसोमखौ फबनाय
जादोँमोन।

नाथाय सहैनाय समसिमाव
आं जोबोद गिदोँब्लाबो
बुहुतखौ नुनाय
जायाखिसै।

लामायाव बिफांनि
बिलाइफोरा हले आंखौ
सिगिदोँमोन।
बेबादिनो गिनायजोँनो
मावजि गोसोम फबनाय
हाखरखौ मोनहैबाय आरो
बुरबाय आं।

बुरै बुरै उनाव गेसाव
मोनामबाय।
मोनामनायावनो गन्थंखौ
हमथेनो गोनां जाबाय।

आरो बोरैबा मेगनखौबो
स्रोब मेसेबफ्लांबाय
"आवबा"।
 
एम्बु बेदरजोँ राम
गंब्रैजोँ फार्टि
जानायनि खोथा।
लरं दांग्राया बुं
खिफिनानै होदोँ।

आंनि मोदोमाव आथिँ
होग्रां हरनायावनो
सिरि मोनदोँ आं।

आंनि गामसाखौ बुखुनानै
गावनि मोदोमाव
फानफ्रेबायदोँ।
जेजे हानाय अखाजोँ
गोजांदोँ जानांगौ
मानसिया।
Posted: 2016-05-10 10:39:57 UTC

This poem has no votes yet. To vote, you must be logged in.
To leave comments, you must be logged in.
Tweet