अरननि दाइरि 1.05, by Ronjoy Brahma Subscribe to rss feed for Ronjoy Brahma

05. सिरिया रुम्बांआ
उखैनायनिफ्राय

थैनांगौब्ला थैथोँसै,
थांनांगौब्ला थांनानै
थाथोँसै।

थैनायनिफ्रायथ' रावबो
बारग'नो हाखाया।
खेबसेब्लाबो
थैथारगोनखि थैथारगोन
रावबो हेव खालामनो
हाया।

दिनै बे सेंग्राया आंखौ
मा खालामो, जेबो जेबो
खालामथोँसै।
बिनि आखायावनो आंनि
जिउआ थाथोँसै।

नाथाय साव नांगोन, फाफ
नांगोन बियो बेबादि
खालामब्ला।

गोसोजोँ बेबादि
सान्नानैनो अरननि
सेरावनो थाबाय
रुम्बांआ।
दखनाखौ गोरायैल'
गानफामनानै लानानै।

मेगननि मैखिफोरखौ
आखायजोँ
बोखारस्रांनानै
लाबाय।

जेब्ला साना सानजा
रुगुंनिफ्राय लासै
लासै नेनाय गैयै
ओँखारबोनानै बिफां
लाइफांआ गेवलांसारो।

दुलाराइ अरननि दाउसिन
दाउलाया आदार
नागिरबाय।
नागिर नागिर जाबाय उदै
सुफुंनो थाखाय।

रुम्बांआबो जोबोद
ओँखाम उखैबायमोन।
नाथाय बहा ओँखाम
मोनजालायखो?

सोर होफैगोन? सोर
लाबोगोन? आरो बे
अरननिफ्राय आरो आं
माबोरै गलांबावगोन?
बेबादि सानबाय
रुम्बांआ।

बियो आरो सानबावबाय- आं
दिनै बुथार जायाब्लाबो
उखैनायजोँनो थैसिगोन।

नाथाय गोसोआव बेबादि
लोरबांथियै गोबां
सानदोँब्लाबो उखैनानै
थानांनायखौ रुम्बांआ
सहायनो हायाखिसै।

"ओइ गुण्डा, आं जोबोद
ओँखाम उखैबाय।
आंखौ मिनिसिरि
दैसासिमल'
दोनलांफिनदो।"

नाथाय अरना जेबो बुङा।
बियो लाजिनाय
मोन्नायजोँ मोनसे
बेन्दोँखौ बोनानै
होबाय।

फांसे गेदेर आखि बिफांआ
ग्लुब ग्लुब मावबाय।
सिरिया रुम्बांआ जोबोद
गिदोँमोन।

नाथाय दान्धिसे उनावनो
माब्रै मोख्राया थालिर
गोमोन, थाइगिर फिथाइ
गोमोन लानानै फैबाय।

मोख्राफोरनि मिनिसुलु
मिनि मिनि लानजाइ
सोमावबोनायखौ सोमो
नांदोँ रुम्बांआ।

फिथाइफोरखौ होनानै
थांफिनदोँ
मोख्रामोना।
थालिर गोमोनखौ अरना
रुम्बांनो जासिबाय।

लोगो लोगो सिरिया
रुम्बांआ जोबोद रागा
जोँनानै बुंबाय-

"बे थालिरखौ जानानै
आंखौ उखैगागोन सानदोँ
नोङो?

जुनारफ्रासो जायो बेखौ,
जुनारफोरनि थाखायसो
बियो।

आं जाया, आंखौ मिनिसिरि
दैसासिम दोनलां।
नङाब्ला आंखौ थांनोल'
होदो।"

अरना जोबोद लाजिनाय
मोनबाय।
आरोबाव सिरिया
रुम्बांआ बुंबाय-

"नोँ मानसि नंगौ ना नङा?
बेबादि हाग्रा गेजेराव
थानो?

आरो आंखौबो हाग्रा
गेजेरावनो लाबोबाय
नोङो।नोँ मा सानदोँ?

मा खालामनो सानदोँ?
आंखौ बुथारा मानो? ना
रसा फोनांनानैसो
बुथारनो सानदोँ?"

नाथाय मा सानदोँ, मा
लुबैदोँ जेबो फोरमाया
अरना।
बियो लाजिनानैनो
गंस्रिनानै थाबाय।

रुम्बांआ सोँबावबाय-
"बेफोर मोख्राफोरा
नोँनि बान्दा जाबाय?
नोँ जिराय जिराय उन्दु
उन्दु बिसोरनि सायावनो
जायो?

नोँ मोख्रा फिग्रा? ना
मोख्रा फिग्रानि
फिसाला?"

जेखि बुङा अरना सिरिल'
थायो लाजियै लाजियै।

उनथाराव उखैनायखौ
सहायनो हायैनि थालिर
गोमोनखौ मागा मुगा
जाबाय रुम्बांआ।

थाइगिर फिथाइखौबो अखा
अखा जाबाय।
उखैनायखौ बेबादिनो
दबथायबाय।

अब्ला फुंनि साना
माब्लाबानो बयनिबो
थिखिनियाव नांबायमोन।
Posted: 2016-05-16 06:09:05 UTC

This poem has no votes yet. To vote, you must be logged in.
To leave comments, you must be logged in.
Tweet