अरननि दाइरि 1.06, by Ronjoy Brahma Subscribe to rss feed for Ronjoy Brahma

06. रुम्बांआ
खारखोमानायनिफ्राय

रुम्बांजोँ खर'आव
अन्थाइ खुबै जानाया
द्लामैनो जादोँ अरननि
गाराया।

जेब्ला रुम्बांआ उदै
बेग्रां थालिर फिथाइ
आरो थाइगिर फिथाइखौ
मागा मुगायै जाबाय थायो
अब्ला हाग्रायाव मुलि
नागिरदोँमोन अरना।

दंफांनि बिगुर आरो
हाग्रा बिलाइखौ गावनि
आखायजोँ खेबखा
बायदोँमोन।

बे खाबुआवनो रुम्बांआ
आन्दोयै
खारखोमानायसै।

खारै खारै बबेजोँ
मिनिसिरि दैसाखौ
मोनहैगोन लामाखौ
दिहुननो हायाखिसै।

अरन सौसि सौसि, अरन
गिदिँ गिदिँ गेजेराव
आन्दायनानै बोरैबा
थाइगिर दैसायावसो
सहैबाय।

जोबोद समायना थाइगिर
दैसाया।
ख्लाब ख्लिब खोल खोल
बेसेबा मिनिखुसि
बोहैनाय दैसा।

दैसानि सेर सेर
सोरगिदिँ जेरैबो
गेवलां गेवथां
हाग्रानि बायदि बिबार।

दैसानि सेर सेर थाइगिर
बिफांनि लारि लारि।
फिथाइफोरा दिन्दांङै
बाज्रुमहां थब्लहां
दैसा बिखायाव
नायगोमोना थादोँ।

गोबां रिदि रिदां
सानथ्र हायै गोमोन
फिथाइफोरा दैसायाव
बाज्रुमनो थियारि
जानानै दं।

थाइगिर दैसानि गोदान
मिथिँगाखौ मुहिनां
मोखांजोँ नायगोमो
हाब्बाय सिरिया
रुम्बांआ।

नायै नायैनो
समायनानिफ्राय आरोबाव
समायनासिन नुबाय।

खोलो खोलो बारा बिनि
सोलेरखौ दैसायाव
गोजोमगौ गोजोमगौ गोसो
बोरहोबाय।

जेरैबो रैसुमै
रोजाबनाय दाउनि
मेथाइफोरा गोसोखौ गलि
होबाय।

जोबोद अनसुलि जानानै
रुम्बांआ दैसा फारसे
खाथिनिफ्राय
खाथिसिनाव थांबाय।

अब्ला हानजासे
सिख्लाफोरखौ लंथं लंथं
दुगैनाय नुबाय बियो।

फोथायगोन फोथाया
जानानै मेगनखौ
बिलिरबाय नाथाय नंगौ,
बिसोर लंथं लंथंङैनो
दुगैदोँ।

जोबोद समायना समायना
सिख्लाफोर, बेबादि
सिख्लाफोर माब्लाबाबो
नुफेराखैमोन सिरिया
रुम्बांआ।

सिख्लाफ्रा रुम्बांखौ
नुहरनानै आखाय फोलाव
फोलाव लेँहरबाय।
बिसोर आखाय फायखन फायखन
बेसेबा खुसियै
लेँहरबाय।

रुम्बांआ बिसोरजोँ
दुगैफाबाय।मिनि खुसि
सिमांबादियै समायनायै
बादुंगा गेलेलायबाय।

सिरिया रुम्बांनि
दखनाखौ सिख्लाफ्रा
ब्रुद खुनानै होबाय।

सिरिया रुम्बांआ जेबो
उदिस मोनाखिसै, बियो
मिनि खुसियै दैयाव
थब्लबाय।

सानस्रिबाय आरो
सिख्लाफोरजोँ
होसोलायनाय गेलेबाय।
 
Posted: 2016-05-16 06:32:17 UTC

This poem has no votes yet. To vote, you must be logged in.
To leave comments, you must be logged in.
Tweet