अरननि दाइरि 1.07, by Ronjoy Brahma Subscribe to rss feed for Ronjoy Brahma

07. थाइगिर दैसानिफ्राय

सहायनो हायैबायदि
सान्दुंआ थिँ थिँ
दुंलुब थारदोँ।

सिनारि अरननिफ्राय
ओँखारबोनानै मेंरुनाय
गोसो आरो लोरला देहायै
दै लोँफैदोँ थाइगिर
दैसानि आफांआव सासे
फलाना।

ग्रद ग्रद दैखौ खुगा
सोमब्रनानै गांगाजासे
लोँखांनानै बियो
मोखांखौ सुदोँ।

बिनि उनाव बियो गावनि
लंफेनखौ खुनानै जांगोन
गोजायै दुगैदोँ।

गुलिनि जलंगा आरो
सिलाइखौ दैसानि
बोरियाव आलांगायै
दोनदोँ।

दैसानि बिखायाव
लोहाबनाय समावनो
सोरनिबा दखनाया फलाननि
मोखांआव खोबलोब फैबाय।

नायबाय बियो सोरनिबा
दखनामार, नुनानैनो
गोसोजोँ गोसो सानबाय
बियो-

"बेबादि गुदु अरननि
दैसायाव सोरबा
सिख्लानि दखना!

जानो हागौ सोरबा
सिख्लाया बे दैसानि
खर'आव दुगैदोँ।
मोजांनि बाथ्रायानो
जादोँ।

दिनै मोजांनि खाबु
जागोन आंनि थाखाय।"

बेबादिनो दैसानि खर'
फारसे दावखोलांबाय
बियो।
जब' जब' दैसानि खर' फारसे
आथिँ गासोम गासोम।

फलाननि फैनायखौ नुनानै
दैसायाव दुगैबाय थानाय
हानजासे सिख्लाफ्रा
स्रोब गोमोरलांबाय।

सिरिया रुम्बांआ जोबोद
सोमो नांबाय।
गावदि लंथं जाबाय
अब्लासो हमनो हाबाय
बियो।

गावनि दखनाखौ
नागिरदोँमोन बियो लोगो
लोगो सासे मानसिखौ
जांगोन गोजायै गावनि
फारसे दावखोबोनाय
नुबाय।

खाथियाव सफैथारबा
गिनाय आरो लाजिनायजोँ
दैसायावनो गोजोमनानै
थाबाय सिरिया
रुम्बांआ।

फलाना मिनिसुलु
मिनिबाय आरो बुंबाय-

"एसेबां समायना सिख्ला
बे अरन गेजेरनि
दैसायाव।

दिनै खाफाला जोबोद
मोजां आंहा।"

रुम्बांआ जोबोद
गिनायजोँ बुंबाय-

"नोँ सोर? अन्नानै आंखौ
रैखा खालाम!
आंनि दखनाया आफांजोँ
गोजाव लांबाय!"

फलाना गोदै खेबसे
मिनिगारबाय आरो
बुंबाय-

"रैखा खालामगोन सना
नाथाय नोँ गावनो आंनो
गथायनांगोन।

फै समायना आंनि सेराव,
बेबादि दैसा गेजेराव
जाया।

फै दैसानि मारुंआव
थांनि-"

रुम्बांआ जोँखांनानै
बुंनायसै-

"गुण्डा, लाजिनाय गैयै
बेबादि बाथ्रा दाबुं
नोङो।
आं जोबोद गिदिर खैफोदआव
गोग्लैनानै दं।

बेबादि समाव खैफोदआव
रैखा खालामनायासो
मानसिनि घोरोम।"

"बेबादिनो सिखार आरो
मैहुर खालामनायनि
थाखायनो आंनि जोनोम।

आरो बेबादि अरन गेजेराव
सासे सिख्लाखौ लोगो
मोनोब्ला, सोर सादु
फलाना ओरैनो गोसोखौ
दबथायनो हायो?"

"अन्नानै बेबादि
दाख्लाम आंखौ।
बे अरननि जुनादआनो आंखौ
बेसिम लाबोदोँ।

आं दा खारखोमानानैसो
लामा आन्दायना बे
दैसासिम सफैदोँ।

नोँ आंखौ रैखा खालाम,
आंखौ नसिम दोनलां आदा!"

"हा... हा... हा.. नोँनि सल'खौ
आं खोनासंलिया।
फै आंनि सेराव, बे
मारुंआव सानैजोँ मिनि
खुसियै गेलेनोसै।

बिनि उनाव आं नोँखौ
उदाङै उदां हगारगोन।"

सिरिया रुम्बांआ रागा
जोँनाय आरो गिनायजोँ
दैसानिफ्राय मारुंआव
गाखोनायसै।

मारुंआव थाइगिर फिथाइ
थायसे मोन्नानै खेबसे
फलाना मारुंआव मानखो
हांब्लानो खर'आव थांखाव
खुबैनानै खारनायसै।

फलाना दैसायाव फोद्डा
खांग्रां
लांफिन्नायसे आरो
मारुंखौ गाखोनानै
रुम्बांखौ होसोनायसै।
Posted: 2016-05-16 07:06:07 UTC

This poem has no votes yet. To vote, you must be logged in.
To leave comments, you must be logged in.
Tweet