अरननि दाइरि 1.08, by Ronjoy Brahma Subscribe to rss feed for Ronjoy Brahma

08. अरना रुम्बांखौ
नागिरनायनिफ्राय

खर'आव गाराय जानायाव
हाग्रा मुलि फुन्नानै
अरला बिगुरजोँ खानानै
लादोँ अरना।

नाथाय एमाव जेब्ला
सिरिया रुम्बांखौ
नुयैलाय जोबोद दुखु
मोनबाय बियो।

लोगो लोगो बियो हाग्रा
अरन गेजेर गेजेर
नागिरबाय।

अरन सिँखाव सिँखाव ओरै
थांलाय हरै थांलाय
सिनारि अरन गेजेराव
नागिरबाय।

दसे उनाव खोनाबाय बियो
सोरबा सिख्लानि
गाबख्राव गाबख्राव हां
गहां गहां खारनाय।

अरना हमनो हाबाय बियो
सिरिया रुम्बांआनो
जानो हाथारगौ।

बे फारसे होसोलांबाय
अरना गोख्रैनो आगान
गोलाव गोलाव
फोलावनानै।

उनाव नुहरबाय सिरिया
रुम्बांखौ सासे लंथं
मानसिया मोनहां मोनहां
होसो गासिनो दं।

खारलांदेरबाय अरना बे
फारसेनो थोँजोङै।
खारै खारै सिरिया
रुम्बांआ अरनखौ नुनाय
लोगो लोगो बिनि सेराव
खारलां देरबाय।

सिरिया रुम्बांआ जोबोद
मेंनायजोँ अरननि
बिखुंआव थाखोमाबाय।

फलाना अरननि सेराव
लाजिनाय आरो रागा
दिन्थिबाय।
दोम थाथ'नानै रागाजोँ
बुंबाय-

"सोँ नोँलाय? बे मानसिया
आंनि हिनजाव आंनो
गथायनानै हो।"

सिरिया रुम्बांआ
मेँनाय गारांजोँ
बुंबाय-

"बे मानसिया गुण्डा,
बियो मैखारि।
अरननि अनजाथाव
जिउनांखौ फोजोबनो
नोजोर होग्रा।

बियो आंनि गोथार
सोलेराव नोजोर होदोँ,
आंखौ जिनाहारि खालामनो
होसोदोँ।"

दिउ दिउ रागा जोँनानै
फलाना अरनखौ बोलो
होनानै सौबाय, नाथाय
अरना थाब्रुम हमथाबाय।

आरो गावबो गोबां बोलो
होनानै सौगासिनो सौबाय
फलानखौ।
फलान फोद्डा खांग्रां
खुग्लुब जाबाय।

सिखार फिन्नानै फलाना
अरनखौ सौबाय, दान्थेबाय
अरना।
बिनि उनाव सानैजोँ गुदा
गदि नारा नाथा
बुलायबाय।

दान्देसे बेबो जेना
बेबो जेना जालायबाय।
बेबो सौवो बेबो सौवो, बे
जोलाय बे जोलाय जाबाय
थाबाय।

उनाव अरना फलानखौ
हमख्रबबाय आरो बिनि
गोदोनाखौ मस्रायनानै
होबाय।

लोगो लोगो फलाना हां
गैयै, आरो जिउ गैयै
जाबाय।

फलाननि गोथार जिउआ
सोर्गो फारसे मिनिखुसि
फलाननि गुबुंले गोरबो
देहाखौ नागारनानै
बिरलांबाय।

दुलाराइ अरननि बिफां
लाइफांआ ख्रब ख्रब आफा
खबनानै होबाय।

हाजो खना खना थानानै
नायहरनाय जिब जुनार,
बिफां दालाइयाव बानानै
नायहरनाय दाउसिनफोरा
समायना रमायना रैसुमै
मेथाइ रोजाब्बाय।

सिरिया रुम्बांआ अरनखौ
गुगुरुब खुलुमबाय।
बियो लाजिगुसु अरननि
मोखांआव नायदेरनानै
बुंबाय-

"दिनै, नोँ आंखौ रैखा
खालामबाय!
बिनि थाखाय नोँखौ जोबोद
साबायखर।

नाथाय बेबादि अरन
गेजेराव नोँ आंखौ
लाबोआमोनब्ला बेबादि
खैफोदआ जानायबो
नङामोन।

बिनि थाखाय नोँबो
दायनिगिरि जागोन!"
बेबादि बुंनानै सिरिया
रुम्बांआ दुखु गोनां
गाबबाय।

बिनि उनाव गावनि सि
गैयै सोलेरखौ नायनानै
बियो लाजिबाय।
नाथाय लाजिनायखौ
लानानैनो बियो बुंबाय-

"नायसाय आंखौ, आं दा
लंथंसै! आंनि दखनाया
दैसायाव गोजाव लांबाय!

आं दा माखौ गानगोन? नोङो
आंखौ अनोब्ला, आंनि
दखनाखौ नागिरनानै
लाय।"

उनथाव सिरिया
रुम्बांआव गावनि
रागाखौ दिन्थिदोँमोन।

दुखु मोन्नायजोँ अरना
रुम्बांनि दखनाखौ
थाइगिर दैसा फारसे
नागिरनो थांबाय।

लोगो लोगो सिरिया
रुम्बांआबो अरननि उन उन
थांफाबाय।
Posted: 2016-05-17 05:43:51 UTC

This poem has no votes yet. To vote, you must be logged in.
To leave comments, you must be logged in.
Tweet