दाउदै सिखावनि, by Ronjoy Brahma Subscribe to rss feed for Ronjoy Brahma

दाउदै सिखावनि फैमाल

उन्दै समाव दाउदै
खावग्रामोन बियो
मालायनि गग्रानि
खाथाखनिफ्राय।

बिनिफ्रायनो बिनि
मुंखौ थैनानै थांनाय
आबौ जेखाय बोराया
"दाउदै" होनजेनदोँमोन।

खायसे गामिनि
मानसिफ्रा बुंसोलायो
दाबो---

"दाउदै जायै जायैनो
बिनि उदैया दाउदैबादि
गेन्द्राद्रा
दुलुरलुर।"

खायसे खायसे बुङो---
"उन्दै समाव दाउदै
खावग्राखायनो मेट्रिक
आनजादखौ उथ्रिनो
हायाखिसै।
लाथिख मोननानै खेबनै
फैमाल जाबाय।

थामथियाव नकल लानानै
फास जानो सान्नाया
हमजानानै फैमाल
जाबावबाय।
माने Ex-failed ना माबानो।"
बिनि उनाव नै दिनैसो
गावनि गोसो थोनायखौ
हाबा लानो मोनैनि फासि
नांनानै थैनो
ओँखारदोँमोन मेगन
मुसुगुर हाखरारिया।

गोसो थोनाया बोरैबा
बोरैबा गावनि बिमादै
सोमोन्दोआनो जायो।

बेफोर बाथ्राखौ
खोनादोँमोन आं दिनै
फुंआवनो।

फुंनि 9 रिँगायाव
बाङाइगामिनि आगष्टेन
देहा फाहामसालियाव
लाबोदोँनो।

आयं आखान्थिया आंखौ
नायनो लेँहरनायाव आंबो
नायनो थांदोँ।

लामायाव आयंआ आंनो
गुसुंङै खिन्थादोँमोन-
"बेबादिखौनो बुङोलै
मोदोमफुल गांखंआव
मैदेरनि फासि नांनाय।"

आसोलथे दाउदै आदाया
सिलिँनि फांखायाव फासि
नांनो नागिरदोँमोन।

अब्ला फांखानि सुइटसआ
अन दं नाथाय बिजुलि
इलेक्ट्रिकनि बोहैनाय
दाहार गैयामोन।

जेब्ला गामसाखौ खानानै
गोदोनाखौ सोनोल'
नाजादोँमोन अब्लानो
बिजुलि इलेक्ट्रिकनि
बोहैनाय दाहारा फैदोँ।

सिउ सिउ गिदिँनानै ननि
इन्जुराव बुस्रोद
जानानै लोरला
गोग्लैदोँ आदा
दाउदैया। 
Posted: 2016-06-09 08:33:22 UTC

This poem has no votes yet. To vote, you must be logged in.
To leave comments, you must be logged in.
Tweet