थायसेनि दैथाम
By Ronjoy Brahma •
न'आव सफैना बांसिन गाबदोँ आं।
गुंग्राय सुरोखो सुरोखो।
दिनै बेँसिमारिनि ददेरे फैगोन।
फनजोँ फन खोथा दंलायाखायो आंहा।
अब्लाबो ददेरेया फैनाय नङा सन्देह आंहा मानोना ददेरेया द्लाम थगायो।
दुर्गा फुजा जादोँ।
थांनाय बोसोराव आदा मोखाष्ट बसुमतारीजोँ लोगोसे दाउदै खेला होनानै 10 रोजा मुलाम्फा जादोँमोन आंहा।
हार्सिँबा बांसिन मुलाम्फा जाबावगौमोन खोमा??
बेबादि सान्नानै देग्लाय हार्सिँनो दाउदै खेला होदोँ आं।
सोर सोर फिदिँदोँ आरो फिदिँदोँ "सालु.......
थायसेनि दैथाम, दाहोना दैथाम" होनलायनानै।
दान्दिसे बहानिबा सेंग्राफोरा बोख्रेबना बाजि रांनिनो 15 थफ्ला मानि मोनलांबाय।
बिसोर थांनाय लोगो लोगो हानजासे सिख्लाफोर बेँखन फैबाय आंखौ।
ददेरे सैनायबो दं।
खुगाजोँ खुगा रायदावाखिसै आं, मेगनजोँ मेगनल' रायज्लायबाय।
बिनि लोगोफोरा थिखोना माल्दार माल्दारनि फिसाजोफोर जानो हागौ।
गासैबो थाफ्लि आदै गोबाख्रबनाय थाइट फिथिँ लंफेन।
जिन्स लंफेनबो होना बिदिखौ, जोँनि गामिनि सावलुन बावलुन सेँग्राफ्रा कण्डम लंफेन होनना बुङो।
गावसोरनो सोर सोर फिदिँबाय, आं रांखौल' लाग्रा जाबाय।
मोनदोँ मोनदोँ, मोनगासिनो मोनदोँ आंनि खाथन मोनसे दाउदैया स्लिम।
बाजिबा रांल'सो मोनबाय आं।
आरोबाव दाउदै होननायानो गैलिया आंहा।
गाबहां गाबहां जाबाय लाजिनायजोँनो ददेरेखौबो लाजिबाय।
ददेरेनि मोखांआव नायनोनो हायाखिसै।
हानजासेमानि सिख्लाफ्रा मिनि खुसि रिदि रिदां लानानै थांबाय।
नाथाय ददेरेया राव होदोँमोन आंखौ मैखि सिथाबनाय गारांजोँ "आदा" होननानै।
बिनि मोखांआव नायदेरबा नुबाय मोदै थरथिँ थरथिँ गसरदोँ जरासे मेगननिफ्राय।