आंनि थांखि
By Ronjoy Brahma •
आंनि आफाया जिउ नाङैनो हालुवा जानानैनो थाबाय।
हालुवा (आफा)नि दुखु आरो खष्टखौ आं मिथिगौ।
सान्दुं अखा बोथोरनि उनाव बोथोर बेसेबांदि सौसिबोनांदोँ बुंबाबो बुंनानै फोजोबनो हाया।
बेखायनो हालुवानि सायायाव बिजिरना बेखेवना आंहा बुंनांगौ गैलिया।
मानोना जायफोर आंबादिनो हालुवानि गिजि देरायाव जोनोम मोन्दोँ बिसोर गासैबोआनो मिथिगौ।
दिनै आंबो जाहाथे आफाबादि जानाङा, दैज्लांआव गगा आरो सान्दुंआव मोदोम थिफु लायजासे गोलोमदै हुगारनाङा।
बिनि थाखायनो हागौमानि दिनै सोलोँथाइनि फारसे नाजानायासो आंनि थांखि।
आंहा लेखा फरायाव जोबोद गोसो।
सोलोँथाइआनो आंनि अराय जुगामि जानानै थागोन।
आंनि सोलोँथाइआ थांना थायोब्लानो आं सानसे मानसि सिनायथि जानायनि सम्भावना दं।
बेखायनो आं फरायगोन, हानायमानि गोसोजोँ सोलोँगोन।
आं गोदान गोदान आयदा आरो बिजाब बुथुमना बिनि फराखौनो फरायगोन।
सान हर सम मोनोब्लानो बिजाब फरायगोन, हानायमानि आं गोथार मोजां बिजाबनिफ्राय गियान बुथुमगोन।
नाथाय आं दिनैबो आफानि खामानियाव मदद होयै जानाय नङा, आफाया आंनि जाफुंनायनि लामाजोँ थिखोहरनायनि थाखाय मावनाय आबादारिनि हाबाखौ मुगैनाय नङा।
हानायमानि आं आफाखौबो मदद होगोन, जेहेथु आफानि गासै मावनाय खामानियानो फिसानि मोजां आरो इयुन गोजोननि थाखायनो।
आंनि समाय "आं मोजां बाथ्रा खोनासंगोन।"
आं फोथायो इयुनआव आं सासे मेगन गुणु सुबुं जाहैगोन।
बिनि थाखाय आं दिनै समजोँ समान समान खारफागोन।
जिउ मोनसेनि साबसिन थांखिखौ लानानै आं समजोँ बिसुखे खाबाय।