इयुन
By Ronjoy Brahma •
जोँनिनि सोलोँनाय आरो बिनि रोँनायनिफ्रायनो जोँ इयुनखौ मिथिनो मोनो।
फैगोन इयुनआ माबादि जागोन?
बियो आरो माबादि जोँनि मोखांसिम फैनो हागौ?
जोँ थांना थानाय समनि बिमानि आहार जानो रोँनायनिफ्राय बा बोसोर समसिमावनो गोबां बाथ्रा आदब बायदिखौ सोलोङो।
जोँ सोलोङो अनसुलि बिमानिफ्राय, मिथिँगानि बिफां-लाइफांनि बाबेन-बुबेन मोसानायनिफ्राय, खोलो खोलो बारनाय बारनिफ्राय, मिथिँगानि दाउसिन-दाउला, जिबि-जुनार, एम्फौ-एनलानि गाबनाय,
अखा खोरोमनाय मोफ्लामनाय बायदि सिना मिथिँगा मुलुगनिफ्राय।
जोँ बाथ्रा आरो बिनि सोदोब ओँथि दिहुन दिहुन लायो, बिनिफ्रायनो जोँ सोलोङो।
जोनोम उनाव उन्दै समनिफ्रायनो जोँ गोबां आयदा फराखौ सोलोङो।
सोलोँनाय आरो गेबेँ खोनासंनायनिफ्राय जोँ लोगो लोगो मिथिनायजोँ रोँबोनो हमो।
मुलुगाव उजिनाय बुजिनो गोरोँ मानसि माहारिया जोबोद गोरोँ जायो, मोनफा मोनफा फरायनो हानाय आरो गोसो होना खोनासंनो हानाय गियाननि दारै।
थांना थानाय समाव सुबुंआ जोबोद सांग्रां, थांना थानांगौनि थाखाय।
बेखायनो जोँ दिनै सोलोँङै सोलोँङै रोङै रोङै गोबां रोँनायनि उनाव इयुननि बाथ्रा सान्नो हानाय जायो।
बिनि थाखायनो दिनैनि सुबुंआ जोबोद सांग्रांसिन जाबावबाय।
सोरजिगिरि इसोरनि थिनहरनायबादि जोँ मुलुगाव फैनानै सुबुं माहारिया देरै देरै बोरायना थैनाय समसिम गावनि सान्नायखौ फोजोबनो हाया।
उन्दै समाव जोँ जाबादि रोँबाय, बै रोँनायानो जोँखौ सुबुंफोरखौ सांग्रां खालामो आरोबाव जोँ माबादि सांग्रां जानो हायो?
उन्दै समनिफ्रायनो जोँ सिगाङाव मिथिस' हायै इयुन लानानै थाबायो।
जोँ थाबायो गाव गाबागाव मोनफा थांखि लानानै, गोथार गोफार गोजोँ मोनफा जाफुंगोननि मिजिँ लानानै।
थेवबो दिनै एखे मेलेमनि सुबुंआ मानो एखे रोखोमै सांग्रां जानो हायाखै?