बिरहांगामियाव

बिरहांगामियाव (23/01/2016) थांनोबाथाय थांनो आंखौ रावबो हमथा हाया। 22 आरो 23 जानुवारि अक्टआव बर' थुनलाइ आफादनि गा 55थि बोसोरसालिया जथुम्माया देग्लाय बिरहांगामियाव जागोन होनना लिखा बिलाइ सिथाबला बायनाय नुदोँमोन आं। लामानि बबेबा गिदिर बिफांआव, हाथाइ बाजार सोरनिबा सोरनिबा गलानि इनजुरफोराव बेसेबांबा सिगां सानफोरावनो। गोजौनि बैफोर अक्टआ माब्लाबानो फैबायानोसै। दिनै 23 अक्ट, बर' थुनलाइ आफादनि गा 55थि जथुम्मानि गेवलां मेलआ सिरां जिल्ला बिरहांगामिनि मुगाचरण ब्रह्म फोथाराव जागोन। दिनै बांद्राय उन्दुनानै थाबैनो सिखारख'नो हायाखै, फुंनि स्नि रिँगायानो जानो हमबायानोमोन। सिखारनायनि उनाव मोखां सुना देलाइदोँ आं बिनि उनाव ओँखाम जादोँ। ओँखाम जानाय समाव आं आयखौ बुंदोँ- "आयै आं बिरहांगामियाव मिथिँ जानायाव थांगोन, आंनो मटर गाखोनो सेजौ रां नांगौ।" "सोर सोर थाङो" "आं हार्सिँसो, होजोँ मेल्ला लोगोफोर थागोन" होननानै आं थांनो थियारि जादोँमोन। आयआ आंनो बाजौ रांखौ गथायो। आमटेकानिफ्राइ हारसिंनो अट' रिक्षा गाखोना साफागुरि मोनसैनायसै आं 10 रिँगायाव। साफागुरिनि मोनसे फिसा गलायाव आं रिचास बायदोँ। ओजोँ माखासे लोगोफोरखौ लोगो हमनांगौ जादोँ। बे समावनो आं माखासे मानसिफोरखौ लोगो मोनो, बिसोर तेजपुरनि आरो आंनिनो सासे लोगो मनजिल बसुमतारी। गुसु गोजां बोथोर, स्रो स्रो बार बारबाय थादोँ। अखा दोमैलु लु, जोमैया सानखौ फांथेनानै लादोँ। लासै लासै ज' ज' सा जिबानि हानजा जोङो साफागुरिनिफ्राय बेँटल गेदनिफ्राय थाबाय लांनायसै। मेलावनो थान्दै जानानै फैनाय तेजपुरनि बिसोर। बिसोर बर' सावथुन नागिरबायदोँ मेम'रियाव कफि खालामना लांनो नाथाय खाफाल गाज्रि जेरावबो मोनाखिसै बन्द गैया बायदि। बेँटल गेदनिफ्राय बिरहांगामि मुगाचरण ब्रह्म फोथारसिम अटजोँ थांनायसै जोँ। हाबजेन्नाय गेदआव सासे बर' बोराया खुसेर फानदोँ बेयाव बिसोर बाग्लोबनायसै। बिसोर साफा सफा खुसेरखौ थुख्रा थुख्रा गुसुं खालामना खानायसै। न'आव गायनो लांगोन जादोँ माखासे आरो माखासे सिखा दाबाजोँ सैनानै गुसु गुसा जानायसै, जेन'बा माब्लाबाबो खुसेर होननायखौ मोनजाफेरथाराखैसो। बोथोरा गुसुखाय जोँ मनजिलजोँ आंजोँ जायाखिसै जासिसेयावबो। खुसेर जासे जानानै बिसोर माखासे बजा खानानै लाबाय बिनि उनाव जोँ थोँजोँ बिसोर थानाय थान्दै बादासिम थांबाय। दान्दिसे जिरायना बिनि उनाव जोँ ज' ज'यैनो दिन्थिफुं मेलाखौ खेबसे नायगिदिँबाय। दखना गामसाखौदि बर'फोरा एसेबां मोजां मोजां दायो नायना गोमोदोँ जोँ। इन्दिनि जोमग्रा गस्लाफोरा बेसेबांबा बेसेन गोसा नायै नायैनो बायनो हायाब्लाबो सोँबायल' जोङो। बिनि उनाव मेलाखौ मोजाङै नायस्राना तेजपुरनि थान्दैयाव बाहागो लाफैनायफोरजोँ गावस्रा लायना मनजिलजोँ आंजोँ बिजाब मेलायाव हाबना जोँ बिजाब नायबाय आरो आं गांनै बिजाब बायबाय मनजिला गांसे बायबाय। बिनि उनाव जोँ गेवलां मेलआव बाहागो लाबाय। 3:21 रिँगायाव जोँ मेलखौ नागारदोँ आरो मटर गाखोना बिरहांगामिनिफ्राय बेँटल गेद, बेँटल गेदनिफ्राय साफागुरि। दिनै बे मेलावनो आमटेकानि गोबां गाड़िया रिजाभआव खारदोँ जायनि थाखाय जोँ गंनैसोल' फेसेनजार अटखौ मोनस्लाबाखिसै। खाफाला मोजांदि गामिनिनो गंसे रिजाभआव आवग्रिखानाय अट दं थेवबो बेसेबा गोबाव मोना लायनाय नेनांबाय जोँ जायनि थाखाय साफागुरिनिफ्राय आमटेका जानानै 5 रिँगा बारब्लासो खारबाय न'आव 6:35 रिँगायावसो सफैनायसै।