दमासि अमा खासि

दमासि अमा खासि। दमासिया फैगासिनो दं। स्नि साननि एसेल' आद्रा सान दंसै। बेबो सान फैलाय हर थांलाय थांबानो जाथारसिगोन मिथिस्लाबमोनै। दमासिनि बाथ्रा सानै सानैनो खर'सो गरम मोनबाय लाफास्रिया। सानगोन मानो साना जानो? देग्लाय दमासिनि मुंङै अमा खासिबो फिनाय जायाखिसै। आगोलाव बेसेबांबा सिगांआवनो गंनै गंथाम मायब्रानि जोसानि जौ संनाय जायोमोन। गोसोखौ बोरैबा मोनगासिनो दं लाफास्रिया। थांनाय बोसोरावदि जाबादि जाथाय जानानै थांबाय बेखौ माबोरै बावनो? दमासिखौ देग्लाय दाफै दाफै सानगासिनोसो दंमोन लाफास्रिया। खेँ गुदगुद मोन्दोँ। दमासि होनै होनैबो गोसो आरो बिखायाव गुरलुब मोन्दोँ खनले खनले। थांनाय बोसोरनि जाथायखौनो गोसो खांफ्रांबाय थादोँ दामानि बियो। दमासिया फैगौ, फैगोन संक्रान्थियावनो मेघालयआव लोगो मोन्नाय आंनि लोगो फैगोन होन्ना बुंनाय लेखा दिनैसो आरो फिसाया थिन्नायखायसो ओँखामआव एमाव फुनै फुनै बै जाथायखौनो सान्दोँ बियो- बोसोर बोसोर दमासिनि मुंङै अमा खासि फियो लाफास्रिया। खावसे फानो खावसेखौ न'आवनो फिकनिक जायो। मालायफ्रा हाग्रामा दालां, मानासो, लावथि, गौरां दैसा, लांखार दैसा बहाबा बहाबा जाहैब्लाबो बेहा जाहैया। संक्रान्थाया फैबाय। मायब्रानि गोदै मोदोमफ्रुलायनाय से नै दाननि सिगां संनाय जाखादोँ। दिनै लोदो लोदो गेन्द्रा मुं दोनलायनाय दमासिनि अमा खासिखौ सिथारनाय जाबाय। सिथारबाय माने नायगार नायगार रुवाजोँ देथारबाय। खावसेखौ जालु हाथाइ आरो साफागुरियावबो सोरबा खुरमानो फान्नो हरनाय जादोँ होन्ना लाफास्रिया बुंथिदोँ। खोमा, गन्थं, लानजाइ, आथिँ, बिबु, आसुगुर माखौबा माखौबा सारायसे गोजो गोजो एवनाय जादोँ। बेखौनो दमासिनि फिनाय मायब्राजोँ होख्लायनाय जागोन। मानि उनथारब्लाबो इंराजि गोदान बोसोरनि मुंङै पिकनिक जानाय जागोन। लाफास्रि, बिनि फिसाय आखब, उन्दै बिजावजालि निला, निलानि फिसाय गाखब, बिदा फंबाय बिजावजालि गासै सा स्निजोँ फेगुलायबाय मालाबानो। फेबाथाय मानसिनि सालाया हारा गैया होन्नायखौ रावबो मिथियै नङा। हारा गैयै सालाया गालखाब गैयै खुगाखौ बांद्रायसो दलायबावो। जौ फेबादि मा मा बाथ्रा बुंलाबायोथाय मानसिया! खेबसेयावनो सासे मानसि गोसोआव रोजा रोजा मोखाष्ट लाग्रायाबो गोसोआव लानो हाजोबनाय नङा। एमावा मेलेमखौ गला खालामनाय लोगो लोगो बाथ्रा बुंनो आंगायना रोजाब जेनबाय- "दमासि अमा खासि लाबोदो फिनाय जौ गिसि जौसाय फैगोन आगै दामिनि हाजि हाजि मिथिखा बाहागा थरसे गोमागोन" थुला रासि लाफास्रिनि मोदोमा रेजेँद्रायबाव। दखना फैखोस्रोना बियो रोजाब्बाय- "नङाहाय फाग्ला बेवायसो फैगोन खाम बोराय सिफुं बोराय अस्तातसो फैगोन आदा गाला गाथा सना नङाब्ला जाथारगोन देग्लाय अमासि अमासि" रमान्टिक इंलास मडेल। बेबादि डान्सखौ दानि हलिउड भिडिअ'आव नुयो। आखाय हमलायनानै मोसाबाय बिसोर। बिबाजै बिबोनां खावलाय बिलिरलायबाय। ओजोँ लाफास्रि फिसाय आखबा जोबोद लाजि गारबाय। लाजिनायल' नङा गोसोखौ हमथा थारनो हायैनि दुबफुं सिखारना थाव सोबागारबाय लाफास्रिखौ---। "आयदै फाग्लाया" होन्नानै साया माया माखौबा बागदावबाय एमाव फुन्नाय लाफास्रिया। खाथियावनो नकियाजोँ "थोद फाग्लि फाग्लि" सावथुन नायबाय थानाय आखबाबो बागदावना मबाइलखौ फिउ----।