रजे! नोँ थांनानै था 2.0
By Ronjoy Brahma •
"बेबादि नङाथ'।आंनि बादिब्ला ओरैसो जानांगौ-
अन्नानै, आंखौ जंखायनो नाङा।
अदेबानि आंखौ अन, जंखायनो नाङा।"
"जेखियानो जाया बेफोर रावखान्थिगिरिफोरनिसो बाथ्रा।
माबा जोँ दा रावखान्थिगिरि नामा?"
"नङा, नाथाय नोँ माबा बुंनो होनदोँमोन"
"औ बावदोँसो।थांनाय हराव नोँ बेसे समाव उन्दुआ?"
"नोँ उन्दुलांनायनि उनाव।नोँनो आं सि फोनग्लुबना होदोँमोन।"
"नंगौ नोँ आंखौ जोबोद अनथारोलै सयथिबो।
नाथाय आं 3 रिँगायावसो उन्दुलांनो हादोँमोन।"
निजोराया जेन्नायबादि मोनो।
फेस्ला बाथ्रायानो अरननि खुगानिफ्राय जोबनो रोङा।
बियो बाथ्राखौ गेददा गेद्डिल' बोलाङो, थोँजोँ बाथ्राखौ बुङा।
नाथाय बिनि गुबै बाथ्राखौ मिथिनांगौ जायोब्ला खेबसेनो एरहरनांगौ जायो।
बेखौ लासै लासैनो निजोराया मिथिगौ।
बियो बेबादिनो खायदा खालामनानै अरनखौ बुंबाय-
"अरन आदा, थांनाय हराव आं जोबोद गिदोँमोन।
नाथाय बिनिफ्रायबो नोँ बांसिन गिदोँमोनदां?"
"औ नंगौथ', सोरबा नुफैयोब्ला रावबो सिखारैयावनो दर बुनानै?
बेबादिनो सानदोँमोन आं।"
"नाथाय नोँ आंनो बेखौनो खोन्थानो नागिरदोँमोन?"
"बेनो नङा, गोजाम बाथ्रासो"
"बेयो माबादि? बुंना आं खोनासंगोन"
"निजोरा आं गाबनो ओँखारोलै सना! बैफोर गोजाम बाथ्रा नाथाय आं दाबो बावनो हाया।
बेफोर गासैबो बाथ्राखौ बावनो नाजानानै आं दिनै जेबो फेस्लायै थानो मोजां मोनो।
बेबादियावबो नोँ गैयाब्ला आं जोबोद गोसो खांबावो निजोरा!"
"आं अराय नोँजोँनो थागोन अरन आदा।
नोँनि दुखुखौ आं बावगारनो फोरोँगोन।
नाथाय अरन आदा नोँ बै बाथ्राफोरखौ आंनो खिन्थानांगोन।
थेवबो नाथाय नांथारै बाथ्राखौ खिन्थायैयानो मोजां।"
"थांनाय हराव गिनाय जाथाया बै जाथाय बादिनोमोन निजोरा।
नोँ थारैनो मिनिथारगोन होनना आं सानो।"
मिनिसुलु मिनिनाय बेरखांदोँ अरननि मोखांआव।निजोरायाबो बेबादिनो मिनिनायजोँ बेसेबा हांखुर जादोँ मिथिनो।
लासै लासैनो अरना निजोरानो सल'खौ खिन्थालांदोँमोन।
ओइदिनखालि जोबोद हरथौबायमोन।हरनि 11.30 रिँगासो जाबायमोन।
गाव गाबागाव नफोराव सिरि उन्दुस्रि जोबबाय।माहाजोनमोना बयबो उन्दुनानै गासे हंख्रदगु लायबायमोन।
बे समावबो अरना लेखा फरायगासिनो दंमोन।
निनाया गावनि खथायाव उसु खुथु जाबाय थादोँ।
थाथेरनो हायै जादोँ बियो, थांलाय-फोलाय न सिङावनो सा-खोला थाबायबाय थादोँ।
दसेनो बिसिनायाव जिरायदोँ, दसेनो सियाराव दसेनो बिसिनायाव उन्दुग्लेमदोँ।
दसेनो मबाइल सेरदोँ, दसेनो गसंलाय जिरायलाय।
ओइदिनखालि हरावनो बियो बाह्रायाव खेबथाम ओँखारदोँ।
लासै लासै ओँखारदोँ गावनि दर्जाखौ गाबहोआखै नाथाय बियो लासै लासै अरननि खोरखियावसो बुफैबाय थादोँ।
खेबले खेबले बुफैलाय नारफैलाय खालामदोँ।
जानो हागौ बियो खेबसेबा अरनखौ उन्दुबाय सानदोँ, खेबसेबा बियो जेबो उदिस मोनाखै होननानै सानदोँ।
नाथाय थाला मेननानै अरना मोनसे गब्लंजोँ नायखोमागासि।
सोर जानो हागौ, सिखावना मानसि लांखारग्रा जाखो साननानै।
बियो खेबले खेबले निनाखौनो नुदोँमोन आरो अरना सानदोँमोन-
"जानो हागौ निनाया लोमजादोँ नङाबा उदैफोरसो साजादोँ नामा?"
नाथाय खोरखि बुफैदोँ नारफैदोँब्लाबो निनाया खेबसेबो राव होआखै।
उनथाराव निनाया अरननि दर्जाखौ नारफैबाय।
आरो एबार बियो दर्जाखौ नारै नारै बुंबाय-
"अरन आं निना।दर्जाया खेवना दर्जाया खेव।"
अरना सिगांनिफ्राय सावगारिखौ नुनानै अनखांनाय फैदोँमोन।
बियो ओरैनो लोमजादोँ एबा उदैफोर साजादोँ बायदि साननानै।
अरना दर्जाखौ खेँनानै होबाय बियो आरो सोँबाय-
"मा जादोँ? मा जादोँ निना?" नाथाय निनानि खुगानिफ्राय रावआनो ओँखाराखिसै।
बियो मा बुंगोन मा बुंगोन जानानैनो थाबाय।
उनथाराव "अरन, अरन आदा फ्लिस" होननानै थाबथाबाय।
बेबादिनो अरना सोँनायाव उनाव गंसे रेबगन नांगौ होननानै बुंबाय।
आरो मिनिसुलुयै "जाम्बि बेखौनो गोजांगु लायथारबाय" होननानै गंसे रेबगन हरबाय अरना।
निजोराया मिनिसुलु जादोँमोन बियो बुंबाय-
"अ' बिदिसो जादोँ?"
औ बेबादि जाखांबाय। नाथाय बै समाव आं जुदि सासे गाज्रि मानसिबादि आखलनि जायोमोनब्ला?"
"मा जानो? नोँनि बिफा जासिगौमोन आरो" बेबादि होननानै खैखै बिनिबाय निजोराया।
नोँखौ होननानै नंखायैनो होसोनो नागिरफ्लादोँमोन अरन।