निनाया अरनखौ मोनाब्ला
थैगोन होन्नायबादिनो
निनानि नखरा थैहोनो
राजि।

बिसोरनि बादिब्ला- "नोँ
थै अब्लाबो अरनजोँ
नोँनि जुलिया जानो
हाया।

सासे फाग्लानोनो हरगोन
अब्लाबो गुबुन घोरोमनि
सासे सेंग्रानो हरनाय
जानाय नङा।"

बिमाफाखौ जोबोद
मुगैदोँमोन
निनाया।घोरोम गैयै
होन्नानै सान्दोँमोन।

बिसोर घोरोमा माखौ बुङो
बेखौ मिथिया होन्नानै
गाबै गाबै
सोंखारिदोँमोन।

घोरोमखौ मान होनो रोङै
अन्थाइ बिखा, घोरोमखौ
मुगैग्रा होन्नानै
सोँखारिदोँमोन।

सैथोआ थुब्ला थुब्ला
अरखि जोँदोँमोन निनानि
मेलेमनि गियानजोँ।

नाथाय जायनाव अख्रा दं,
बिनियाव गियाना थाया।
बियो बुजिनो थाखाय
गोबाव सम नांगौ जायो।

बियो उनाव गावनो सानसे
बुजिथारो।

न' सिङावनो रानथेँथेँ
जालांलायदोँमोन
निनाया जोबजानानै।

बे समाव निनाखौ
हाखु-दाखु गोबां मोजां
मोजां सेंग्राफोर
नायनो फैदोँमोन।

नाथाय निनाया जाम्बा,
गियान गैयै बुजिनो
रोङै।

सान्नो रोङै, मोजांखौ
सिनायनो हास्थायनो
रोङै होन्नानै
रायहरदोँमोन।

सानसे समाव बेबादिनो
सहायनो हाया हाया
जानायाव फानजारि
सिङावनो गावखौ
सुइटसाइट खालामना
लादोँमोन निनाया।

बेबादिनो अरना साननै
निजोरामोनहानाव थानाय
समाव निजोरानो सल'खौ
खिन्थालांदोँमोन।

बेबादि अंअं खारबोनानै
बड'लेण्ड बासआ
साफागुरियाव
लाखिफैबाय।

अखानायैनो अरना न'आव
फैफिन्नायनि खोथामोन
नाथाय हरनै गोजोन थानो
गोनां जाबाय।

एमब्रा एमब्रा निजोरा
बिमायानो हरसेखौ
लाखिबावदोँ।

गोबां बाथ्रा
सावरायलायनायबो
जालांबाय निजोरा बिमा
बिलाइजोँ अरनहा।
मोजाङैनो सिनायथि
जालांबाय।

एबार माब्लाबो
लामाफ्राव निजोरा बिमा
नङाबा बिफाजोँ
नुब्लानो आफा एबा आय
होन्नानै
रायज्लायनांगौ जाबाय
अरनहा।

थिगैनो दं अरनखौ निजोरा
बिमा आरो बिफाया
मोजाङैनो फसायबाय।

हरगोन होन्नानै अरननो
थिक खालाम खाबाय।
बेयाव रावहाबो हेँथा
होनो गोसो गैया।

रावहाबो बेबादि एफा
मोजां मोनलायनायाव
हेँथा होनो मोन्थाइबो
गैया।

मानोना अरनमोननि बैसोआ
नांगौबादि
जायाखैब्लाबो बिसोर
दिनै मोजाङैनो बुजियो।

निजोरा बिमाया जावैसो
होनलायहरखादोँ।

जयैनो हरसे ओँखाम जानाय
समाव जाबाव जावैसो उदै
बुंजासे जा होन्नानै
बेदरखौ हायदेर लायनानै
होलायदोँ।

बासआ साफागुरि
सफैनायसिम बेखौनो फारि
फारि गोसोखांबोदोँ
अरना।

लामायाव आखाय सोमाव
हरना थांदो थांदो
होनहरनाय बिफां,
सोरनिबा न'फोरजोँबो
आखाय सोमावलायहरनो
हायाखिसै।

मेगनजोँबो खेबसेबो
मिनिसुलु नायहरनो
समखौनो मोनाखिसै अरना।

साफागुरियाव
ओँखारनानै दानिया
बिसोर अट' गाखोनानैनो
आमटेकासिम थांगोन।

"आमटेकायाव
थांबायलायनो हाग्रामा
दालांखौ
मोनहैयो"-बेबादि
होन्नानै खेबसे
निजोराया अरननियाव
सोँदोँमोन।

नाथाय अरना बिनि
फिन्नायखौ होनो गोनां
जायाखिसै।

अट'आवनो गाखोना थानाय
सासे खुगा रेजेँ बुरैया
थब बुंहरगारबाय "औ
मोनहैयोथ',

बे रौमारिखौ
बारलांबानो मोनहैयो।"

उनाव लामा थारैनो
निजोरा बे बुरैजोँनो
रायज्लायदोँ।

"बेसे गोजान दंबावो
मोननो?"

"नै दानिसो रौमारि
ज्यति आश्रम मोनफैदोँ।

नै दानिसो काग्राबारि
स्कुल मोनदोँ, एसे
थांबावनांगोन।"

"आं दिनैसिम हाग्रामा
दालांखौ खेबसेबो
नुफेराखै।" निजोराया
बुंना लादोँमोन।

बुरैया नाथाय दुगायैनो
बुंदोँमोन-

"दिनैसिम आं
थांलाय-फोलाय हाग्रामा
दालांखौ नुनाया 50 बारसो
जासिगोन।"

"ए" होननानै मिनि खुसि
सिरि थाबाय निजोराया।

बेबादिनो अट'आ लामा
गाज्रियाव खायलेँ
खुयलेँ आवगायबाय।

आगदा आखि आखायजोँ मोसौ
गंआव हमनानै मोसौखौ
फेजेन्नायबादि।

बेबादिनो हाग्रामा
दालांखौ मोनफैबाय।
द्राइभारा
सिबखावलायथारबाय
दालां मोननाय लोगो
लोगो।

हाग्रा दालां मोनजेनबा
निजोराया गावनि आखायनि
सना गाबनि घड़ियाव
नायदोँमोन 3.40 रिँगा
जाबाय।

दालांखौ बारनाय समाव
बियो नायबावदोँमोन 3.42
रिँगा जाबाय। 

निजोराया सानबाय
हाग्रामा दालांखौ
बारनो थाखाय से मिनिट
सम नांगौ।

माबा मिथिनो
लुबैनायजोँ सोँदोँमोन
निजोराया अरननियाव-

"ओइ! बे दालांआ बेसे
गोलाव? माब्ला
गायसनामोनलाय?"

अरना एसे सानहाबलायना
खिन्थादोँमोन-

"1.12 कि.मि।बियो सराइघाट
दालांनिफ्रायबो 100
मिटार गोलावसिन।

25 मे 2013 मायथायाव बेखौ
बेखेवदोँमोन।आंहा एसे
गोनो गोथो जानो हागौ 2009
मायथायाव
बानायजेन्दोँमोन।

आमटेका गोजौ
फरायसालियाव फरायनाय
समाव जोँ जेब्ला बे
दालांखौ लुनाय जासिगोन
होन्नानै गेदेर मेल
खुंब्ला जोँबो
फैदोँमोन।

जोँबो अब्ला आमटेका
गोजौ फरायसालिनिफ्राय
तरुन गगैनि हलिकप्टार
नायनो होननानै
फैदोँमोन।

आं बेयावनो
हलिकप्टारखौ सिगांसिन
नुदोँ।।"

अरना बाथ्राखौ बुंनानै
सिरि थादोँमोन।
बयबो सिरि जाबाय अट'आल'
गाबै गाबै गोख्रैनो
खारगासिनो थाबाय।

बेबादिनो बभानिपुर,
आमगुरि, कैला मैला आरो
आमटेकाखौ मोनफैबाय।

अब्ला समा बेलासिनि बा
रिँगासो जानोसैमोन।