मोनाबिलियाव खोमसि
खोमसि अरना अनजिलाखौ
गावसिनिसिम लेँना
लाबोदोँमोन।

हरनि जानायखौ जायै लोङै
बयबो गोदो गोदो
उन्दुलांदोँमोन।

अरन बिब' रंगिना
उन्दुग्रा खथायावनो
अनजिला आरो निजोराजोँ
उन्दुलांदोँमोन।बेबादिनो
हरसेया गोजोनै थांबाय।

फुंनि सोरांखौ लानानै
दिनै सान जोँमाया
मिनिसुलु नायख' हायै
मोखांजोँ जारौरौ
नुजाबोबाय।

फुंआव बयबो थाबैनो
सिखारदोँ।बयबो दैखराव
मोखां सुहैदोँ।

कलगेद फोनै फोनै
हाथाइखौ ब्रासजोँ जिग'
जिग' मानजिलायदोँ।

गामिनि मानसिफोरा बे
गंसे दैखरावनो दै
खावखांदोँ।

सोरबा सि सुदोँ, सोरबा
दुगैदोँ आरो सोरबा
सोरबा नआव लानानै
थांदोँ।

एसेबां खोष्टयै आमटेका
सालगुरिनि मानसिफोरा
संसार जागासिनो दं दिनै
निजोराया मैया मैया
नुबाय।

सासे डाइन-गु बोसोरनि
हिनजावसा गथ'खौ बियो
जानजियाव दैहु फाफेरना
लांनाय नुनानै
गोमोदोँ।

सासे 12 बोसोरनि हौवासा
गथ'खौ साइकेलजोँ गाह्रा
थायनैखौ खेरियालआव
आलायना लांनाय नुनानै
नायगोमोदोँ।

40 फुट गोथौ दैखर।
दै मोनहैनो थाखाय
दिरुंआ सेरनैसो जागोन।
सोरनिबा दिरुं गिदिरा
बिनिबो बांसिनबाव।

दैखरखौ नायहरब्लानो
ग्रं ग्रं गोथौ नुहरो।
गिथाव बाथाव बेसेबा
गोथौ दैखरनिफ्राय 8
बोसोरनिफ्रायनो
खुदियाफ्रा बेसेबांबा
गोख्रै दै बोखोयो।

बेबादिनो नायै नायै
सानबाय थादोँ
निजोराया।
गाव खेबसे दैखरखौ
नायहरदोँमोन।

दैखौ नुहरस्लाबैयावनो
बियो गिनानै
फावसायदोँ।
आयौ आयौ होननानै बिखाखौ
सिरिहां मोननानै
मेसेबदोँ।

अनजिलायानो दैखौ मोखां
सुनाय, आथिँ सुनायनि
थाखाय खावनानै होनां
जोबबाय।

फुंनि साहाखौ
लोँखांनानै अनजिलाया
नआव थांफिनदोँ।

देलायै साजायै बियो
फरायसालियाव थांदोँ।
देग्लाय बियो थाखो
स्निआवसो फरायदोँ।

सानसुनि सिरियाव अरन
आरो निजोराजोँ फांसे
थाइजौ सायायाव जिरायना
बाथ्रा
रायज्लायदोँमोन।

मा बुंगोन? मा सोँगोन
निजोराया अरननियाव
सोँदोँमोन।

"आमटेकायाव माथो दैयानो
बाना जालायनानै गोबां
आबाद खहा जायो
होनलायनानै आं
माब्लाबा खोनादोँमोन।

नाथाय एफा गोथौ दैखर
नोँसिनियाव माब्रै
बाना जानो हागौ?"

"जोँनियाव दैज्लांबा
हाजोनि दैया फैयो।
बे बांद्राय अखा
हायोब्ला बाना जायो,
लामा सामा उसियो।

मैया आं
खिन्थाबोनायालाय माथो
जाखो?

दैज्लांबाथाय
दैखरगुरिनि लामाया
दंग-जाम्फैफोर बादिसो
जायो।"

"ए बावदोँसो, नोँ मैया
मोनसे बाथ्रा खोन्थानो
होननाया?"

मिथिनो लुबैथारनाय
हांखुरै बुंदोँमोन
निजोराया।

मिनिसुलु मिनिनानै
अरना सोँफिनदोँ-

"माबे बाथ्राखौ?"
"बै दैखरगुरि होननाय
गामियाव, नोँ मैया आंनो
गंसे ख्रुस
दिन्थिनाया।

आरो बे ख्रुसखौथ' नोँ
निनानि होनना
बुंदोँमोन।"

"नंगौ बियो निनानिनो।
आं माबे बाथ्राखौ बुंनो
नागिरदोँमोनलाय?"

"निनाया सानसेखालि
लामायाव गोग्लैदोँ
होननाया?
नोँथ' बोखाङाखैमोन
होनबा?"

"औ ओइदिनखालिबो
दैज्लांआनोमोन।
दैज्लांबाथाय
दैखरगुरि लामाया
साइकेल सालाय जाया।

दैयानो लामाखौ
खुरखंथारो।
दै गेन्दायाव हाखरखौ
सिनाया।

बेबादिनो सानसेखालि
निनाया जोँनि सिगां
सिगां साइकेल
सालायबोदोँमोन
फरायसालि गनानै।

निनाया गेजेर फरायसालि
आरो आं गोजौ फरायसालिनि
गु थाखोआव फरायबायमोन।

निनानि उन उन जोँ
गामिनि साथामसो
सेंग्राफोर दंमोन।

जोँ गोबां मिनिथाव
सावथुननि बाथ्राखौनो
रायज्लायदोँमोन।

बेबादिनो निनाया मोनसे
हाखराव सिगांनि साइकेल
साखाखौ ग्रब'
जादोँमोन।

बियो जल्दब गोग्लैनानै
थिँग्रिँ
सिजाजोबदोँमोन।

नाथाय आं निनाखौ
बोखांहैदोँमोन।
निनानि बिजाबखौ आं
बासायदोँमोन दैयाव
गोग्लैस्लाबनो
हायाखै।

निनाया आंखौ जोबोद
लाजिदोँमोन आरो बियो
आंखौ साबायखर
होदोँमोन।"

"बिनिफ्रायनो नोँसोर
गोसो होलायदोँमोन
नङासै?"

मिनिहाले सोङो
निजोराया, आरो सोँनायनि
फिन नागिरनानै अरना
बुङो-

"बेनिफ्राय नङा।जोँ
कलेज फरायनाय समावसो
गोसो थोलायदोँ होननानै
आं नोँनो
खिन्थाखांबाय।"

"बै सानखालिनिफ्राय
नोँसोर माबादिमोन? आरो
बिनि सिगांआवलाय?"

"नोँ गासैखौबो
मिथिजोबनो लुबैथारो
आरो?"

"गासैखौबो आं सोङाखैना"

"आं देनां खिन्थासिगोन
दे"

"सानसेयाव जोँ गोबां
बाथ्रा सानो।
दिनैनि बाथ्राखौ जोँ
उनाव साननो सोलाबाबो
जानो हागौ।"

"बिदिब्ला
दिनैनिफ्रायनो
खिन्थागोन नाथाय
खिन्थाजोबनो गोबां सम
नांगोन।

नोँ सानथामसो थानो
हायोब्ला मोजां
जागौमोन।"

"मा आंखौ लाखिखानो हाला
नामा?"
निजोराया मिनिनाय गैयै
दुगाजोँ जंखायदोँमोन।

अरना ओरैजाय फिनदोँ-

"थालांनो सानबायबा
नोँनि गोसो।
आंनि आयआ बुरैबाय, बेखौ
नोँबो नुबायना।"

नाथाय निजोराया एसे
लाजिनाय मोनबाय।
बियो लाजिनायजोँ
दान्दिसे नायगंना
बाथ्राखौ
सोलायफिनबाय।